Tá sé d’aidhm ag an gcompántas bonn nua a chur faoin drámaíocht ghairmiúil sa Ghaeilge; struchtúr buan a chur ar fáil don tallann aisteoireachta, léiritheoireachta is scríbhneoireachta atá againn sa Ghaeilge; scripteanna nua a choimisiúnú agus a léiriú go gairmiúil ar ardchaighdeán; drámaí a léiriú don phobal Gaeilge (atá scaipthe go mór idir Gaeltacht agus Galltacht); agus fostaíocht a chur ar fáil d’aisteoirí gairmiúla na Gaeilge.

Compántas neamhspleách atá i Salamandar, gan ceangal le haon amharclann ar leith, ach iad ag baint úsáid as na hamharclanna is as na hallaí éagsúla atá ar fáil cheana féin timpeall na tíre.

Ceann de na dúshláin is mó atá roimh an gcompántas nua, foireann bhuan léirithe a chruinniú, agus gaol a chothú le hamharclanna i ngach cúinne den tír, ionas go mbeidh an compántas in ann camchuairteanna rialta a dhéanamh ó cheann ceann na tíre.